corse

السلام عليكم ،

من فترة ليست بالقصيرة الناس صار لهم هوس بما يُسمى بمشد كيم كارديشيان الحراري خصوصاً بعد مانشرت كيم هالصورة لنفسها وهي بالجيم ..

Screen Shot 2015-08-07 at 10.19.47 PM

الكورسيه معروف من العصر الڤيكتوري إنه يلبس تحت الفساتين عشان تشكل إنحناءات الجسم .. وموجود من زمان بمحلاتنا عشان البودي شيب ونلبسه تحت الملابس في المناسبات .

الفكرة الجديدة هنا إن الكورسيه هذا كورسيه حراري المفروض يلبس لعدة ساعات متواصلة باليوم .. ومع الوقت بينقص مقاس  الخصر ويرسمه وينحفه للأبد .

وكيم كارديشيان مو الوحيدة اللي سوّقت له !

Screen Shot 2015-08-08 at 11.50.11 AM

Screen Shot 2015-08-08 at 11.52.58 AM

حتى جيسيكا ألبا تكلمت في واحد من المقابلات تقول إنها لبست المشد مدبل بعد الحمل نهار وليل لمدة ٣ شهور وإنها سعيدة  بالنتايج .. رابط المقابلة

صراحة بعد هالصور والكلام  والحملة الإعلانية القوية تحمست جداً أجربه لكن قبل ما اشتريه حبيت أسوي بحث صغير وأجمع أراء الأطباء والمجربين وأشارككم البحث بعدين أقرر .. يعني هالتدوينة فيها قصاصات من آراء مختلفة  .. ويمكن .. يمكن مستقبلاً أجربه وأكتب  تجربتي معه بتدوينة ثانية ويمكن لا  .

طيب ، ودي بينكم وبين نفسكم تجاوبون وشو أول انطباع جاكم لما قريتوا عنوان التدوينة حقيقة أم خرافة .. ؟ خمنتوا إن المشد مضر ونتيجته مو حقيقية ؟

يقولون إنه مايحتاج تكون طبيب عشان تفتي بهالموضوع

هذا الكورسيه اللي عمره أكثر من ٥٠٠ سنة راح يضغط على الوسط ويسبب تعرق شديد لكن علمياً مافيه أي دليل إنه يأثر على الدهون أو الخلايا .. اللي فعلاً راح يسويه هو إنه بيعصر الأعضاء الداخلية .. الأضلع على الرئة على المعدة كلها بتنضغط وإذا وقفتي إستخدامه بيرجع كل شيء مكانه بالتدريج .

الدكتور أندرو ميلير يقول : ” مستحيل الكورسيه مهما كان نوعه إنه يحرق الدهون اللي يسويه هو إن يعصر أعضاء الجسم .. ومهما طالت المدة بالنهاية بيرجع شكل الجسم كما كان .. ولو كان فيه أمل منه ولو ١ بالمية .. كنا استخدمناه بديل لعمليات التجميل وإزالة الدهون من الوسط “

الدكتورة ميري جاين بروفيسورة نساء وولادة بجامعة يال تقول : ” فكرة الكورسيه غير منطقية أبداً ماراح تطلعين منه إلا بصعوبة بالتنفس ويمكن يكسر لك ضلع .. ولو شفتي نتيجة بالبداية فهي نتيجة وهمية مؤقتة بسبب الضغط الشديد لكن بالنهاية بيرجع شكل الجسم كما كان ” .

الدكتور كريستوفر اوكر أخصائي تغذية بمستشفى ماونت سيني يقول: ” مستحيل إن الدهون تختفي أو تتقلص بالضغط عليها اللي يصير حقيقة هو إن المعدة تصير مضغوطة جداً بالتالي الدهون تروح بالمكان الفاضي .. فيتهيئ للمستخدم إنه نحف .. ومهما طالت المدة مافيه شي مثل كذا ممكن ينحت الخصر للأبد .. إذا تبغى شي حقيقي ودائم عليك بالرياضة والدايت ولا تضيع وقتك بكتم نفسك بدون فائدة ” .

بصراحة حاولت أكون حيادية وأدور أراء أطباء يمدحون فيه لكن فعلاً مالقيت !

طيب كيف نفسر تجارب النساء الناجحة وتوثيقهم لتجربتهم بالصور ؟

أراء الأطباء اللي فوق جاوبت على جزء من هذا السؤال .. وهو إن ضغط الأعضاء الداخليه للجهاز الهضمي والرئة بيخلي الدهون تجي مكانه وتتعود على هالشكل فترة بسيطة بعدها بترجع وضعها الطبيعي !

وفيه تفسير آخر هو إن المعدة المضغوطة بتخليك ماتقدرين تآكلين طبيعي بالتالي تقل كمية الأكل بالتالي ممكن تنقصين كم كيلو .. مو بسبب المشد لكن بسبب إن معدتك ماتتحمل أكل زي أول

!طيب عادي أنا أبي معدتي تصير مضغوطة عشان يقل أكلي وأنحف ويتشكل جسمي لو مؤقتاً

هذي هي بعض من الأعراض الجانبية المثبتة من المجربين ومن الأطباء :

١- عصارة المعدة راح ترجع للمرئ وبسبب اختلاف وسط المعدة عن المرئ بيصير فيه حرقان ومع الوقت يصير الحرقان دائم

٢- بسبب الضغط القوي على القفص الصدري احتمالية حصول كسر بالضلع تزيد وفيه حالات سُجلت بهالخصوص .

٣- يعيق التنفس وقت الرياضة لأن حجم الرئة بينقص بالتالي الأكسجين مايكون كافي للجسم كامل بالتالي بينقص الحرق وبيزيد كمية ثاني أكسيد الكربون بالجسم .

٤- راح يسبب مشاكل هضمية لأنه يعيق الحركة الطبيعية للأمعاء .

هل تسوى علينا نعرض نفسنا للمخاطر هذي ؟

هنا فديو للدكتور أوز يشرح فيها تأثير الكورسية بالصور

Dr. Oz Shows How Waist Training Affects Your Body

 

احنا نحب الزين وين ماكان .. وممكن نسوي أي شي في سبيل الرشاقة اللي هي نقطة ضعفنا .. فما بالك لما مشاهير هوليوود يتكلمون عن شي أي أحد ممكن يجربه !

زي بودرة بانانا عادية وسعرها معقول فجأة صارت شي ثمين ولازم نشتريه عشان شفناه مع أحد مشهور

:عموماً الموقع اللي جالس يدفع للمشاهير عشان ينشرون صورهم مع الكورسيه هو هذا الموقع

http://www.whatsawaist.com

وكل الكلام اللي انقال عنه من قبل المشاهير هو دعائي بحت وإلا ايش يخلي أحد مشهور يتكلم عن منتج وتزيد مبيعاته بشكل مجنون بالمجان .. مافيه شيء صدفة حتى الأيسكريم اللي يصورون نفسهم وهم يآكلونه اعلان مدفوع !

 فلازم نتريث باختياراتنا .. ولا نمشي مع الدعاية اللي مو بس تخسرنا فلوس .. تخسرنا صحتنا

 لو عندكم أراء ثانية مامرت علي ياليت تكتبونها لي .. مايندرى يمكن أغير رأيي  ..

   عاد تخيلوا بعد الفلسفة أعلاه ..  فجأة أنزل موضوع تجربتي مع الكورسيه ههههههه

 إن شاء الله ما أحتاج ألبسه إلا في العزايم تحت الفساتين وصورة الكورسيه اللي بأول الموضوع هو الكورسيه حقي أخذته من الريس .. بطل ولو إنه يخليني ما أتهنى بالعشاءا

أشوفكم على خير

 

Written by Nora

    4 Comments

  1. Rana_88 8 August, 2015 at 10:42 pm Reply

    سبحان الله كأنك تقرين أفكاري ،،، من كم يوم كنت أفكر بالمشد
    لكن عقب موضوعك هونت عليه :/

  2. Hanna Montana 8 August, 2015 at 10:43 pm Reply

    BIG THANKS TO YOU !!!

  3. Jamilah 8 August, 2015 at 11:53 pm Reply

    انا جربته بس بوقت كنت ما اسوي رجيم بس كنت اكل كل شي صحي لاني أرضع و كنت البسه لمده اربع ساعات لبست يمكن ٤ شهور و اللحين انا رجع جسمي زي قبل و احسني استفدت منه بس مو زي مايقولون

    وانت اللحين ما البسه لاني احس مو محتاجه أبدا مشد الحمدالله

    حتى بطني رجع زي اول مادري طبيعة جسمي او من المشد والله مادري

    لو بحمل مره ثانيه باْذن الله راح البسه
    بس انا مستخدمه شي اكبر من قياسي و طالبته من امزون

  4. Jamilah 8 August, 2015 at 11:55 pm Reply

    و برضو انا ما استخدمته عشان المشاهير اختي جربته قبلي

Leave a Comment