amaz12

السلام عليكم 😀

من فترة مسكت معي أفرفر بالمواقع اللي تسوي كروت حفلات وكذا .. وصممت لي كروت لحفلة صغيرة ناوية أسويها وكنت أظن إن مافيه شحن مباشر للسعودية فقلت لنفسي يالله فرصة أتسوق من أمازون وأجيب بعض الأشياء اللي كنت أبيها عشان أشحنهم مره وحده من أمريكا مع الكروت  ..

موقع الكروت هو:

http://www.tinyprints.com/

amz1

 وأبشركم صار له شحن مباشر للسعودية بعد مافات الأوان وطلبت من أمازون 😀

تدوينتي اليوم خفيفة وسريعة .. فيها عرض لبعض المنتجات بشكل سريع أغلبها بدون تجربة صراحة .. بس أخلصهم أشوف لو إنهم يستاهلون التوثيق بأكتب عنهم بالتفصيل سواءً بالزين أو الشين ..

amaz10

لما كنت بأمريكا جبت لأمي هذي الفيتامينات اللي انشهرت جداً وكثير تكلموا عنها .. عجبت أمي مرره فجبت زيادة لي ولأمي وعشان أوزع على صديقاتي 😀

بصراحة لسى ماجربتها .. بس ناوية أضبط لي روتين غذائي جديد مع الفيتامينات وبعض العناية وإن شاء الله لما أكمل تجربتي أوثقها زي ماقلت لكم .

amaz5

بسناب شات أخصائية التغذية ناتيلي جتها أسئلة كثير عن رموشها ماشاء الله وإنها كأنها تركيب .. قالت إنها استخدمت ماسكرا تغذيها اسمها MD

لما بحثت بأمازون عن الماسكرا هذي لقيت التقييم والمبيعات كثيرة على كحل من نفس البراند أعتقد .. مكتوب إنه يعطي كثافة وسواد للرموش وللحواجب لو تبغين وتبين النتيجة ب ٤ – ٦ أسابيع .

amaz3

لما شفت هالطلبات عرفت إني لحظة ماطلبت هالأشياء نظام نومي كان متعبني هههههه

من اليمين بخاخ لمفرش البيبي بريحة اللافندر .. كله مواد طبيعية وآمن للأطفال .. بعدها ماسك للعيون اللي يصير حار وبارد اشتريت زيه من مطار نيويورك وكان بطل .. بس مره من المرات من التناحة كانت أبيه دافي وحطيته بالمايكرويف وبدل ما أخليه ٣ ثواني زي ماهو مكتوب عليه خليته ٣٠ ثانيه .. وانفقع .. عاد قلت ماراح أخليه بخاطري وطلبت لي ثاني لأنه كان مريح جداً وجميل  .. وأخيراً غطا ظريف للعيون ناعم جداً وجاي معه سدادات إذن بكيس جميل .. حلو للقيلولات النهارية أو للسفر وكذا.

amaz2

هذا شاي الديتوكس لمدة ١٤ يوم  .. اللي مره سوا ضجة حبيت أجربه وأشوف كيف وإذا عجبني ممكن أطلب كميات منه .. واشتريت معه كورة الشاي عشان أسهل بالإستخدام والشرب .. طبعاً ماراح أسوي حمية ديتوكس لأن مو مكتوب عليه إنه لازم نظام غذائي معين لكن مكتوب إنه ينقص الوزن ويفضل أخذه قبل التمرين أو بالصباح .. نجربه مع حمية طبيعية مفيدة  وتمارين ونشوف

amaz4

.وهذا الكريم بعد من البيست سيلر في أمازون .. أتوقع السر في إسمه ..مدري ليه متحسفه أفتحه هههه

مع إني شفته من مشتريات البلوقر لي هيا من آيهيرب اللي يشحن مباشرة للسعودية يعني موب صعب أطلبه مره ثانية لو خلص .. عموماً نجربه ونشوف صدق يفرق وإلا لا !

amaz6

  هذي حركات بركات لأكواب القهوة .. رسمات وترشين عليها الكاكاو باودر .. أمي طلبتها مني وطلبت لي أنا بعد .. أحسها موجودة عندنا بس مدري وين صراحة

amaz11

كريم كوري التقييم حقه حلو .. والصورة أغرتني أشتريه ههههههه .. عاد غبشت عليها عن الفتنة

مافهمت شي إلا إنه يقاوم ظهور السيلوليت وفيه خاصية التقشير

amaz7

amaz8

كتاب بسيط جداً عن أساسيات الفاشن ديزاين ..يعلم الرسم والمعلومات حلوة و مختصرة .. جداً حابة أطلع على هالمجال ويكون عندي باكجراوند بسيط فحبيت أخذ منه نسخة  ..

amaz9

وهذا كتاب صغير عن الإتيكيت في الأكل وترتيب الطاولة .. توقعته صغير بس مو قد كذا خلصته بدقيقة .. بس لطيف ومفيد لكن مايسوا تشترونه بأكتبه لكم في نص بوست أتوقع P: ..

أشوفكم علي خير ..

في أمان الله

.

Written by Nora

    4 Comments

  1. لمياء 30 July, 2015 at 1:08 am Reply

    عليك بالعافية ^ـــــ^ متحمسة تكتبين رايك بالتفصيل عن بعض الأشياء

  2. JOJO 30 July, 2015 at 1:12 am Reply

    تتهني فيهم ياجميلة

    بالمناسبة التصوير رايق ونظيف

  3. Rana_88 1 August, 2015 at 2:16 pm Reply

    أحب تدوينات المشتريات تلهم جدا
    سمعت كثير عن كحل ام دي بس كان لونه فضي
    ياليت ريفير عليه بعدين

    شكرا نوره

  4. خلود 21 September, 2015 at 12:45 am Reply

    ياليتك حاطه الاسعار .. يعطيك الصحه والعافيه

Leave a Comment